panaghoy sa suba

isang pares ng paang
nag-uunahan sa paghakbang.

isang daang nahulma ang anit
sa araw-araw na dinaraanan
ng mga pares na pagal na sakong

kulay pulang lupa't kalahating
metro ang anit na natabunan
ng malagong damuhan ang gilid
na nag-aanyaya ng pagsulpot
ng animo'y pangamba.

nagsilbing uyayi ang
huni ng didit at adodore
sa nagtataasang kahoy

tila adorno ng santacruzan
ang mga kawayang
nagsumiksik na naghulmang
tinik na korona ni Hesus

naglakbay ang giya
patungo sa talampas
kasabay ng mga pagaspas ng
tuyong dahon na tila konsyertong
pumupukaw sa malamig na
kwebang nababalot ng kadiliman

habang nagpupumiglas
ang liwanag mula sa siwang
ng mga patay na sangang
kahoy kasabay ng pagluwag
ng takot ang tinig ng tubig
na nakikipagsayawan sa mga
puno ng sasa senyales na
ang tubig dagat ay muling
makikipagniig sa mga
tolya't talaba ng suba.